◆Hikaayat
Zail Main Chand Hikayaat Arz Kardo'n Jin Buzrugo'n Ne Aale RasoolAllah ﷺ Se Nek Sulook Aur Unki Ta'azeem -O-Takreem Ki:-◆Hazrat Farooqe Aazam Aur Imame Husain RadiyAllahu Ta'Aala Anhuma:
Yahya Ibne Sa'eed Ansaari , Ubaid Bin Hunain Se Riwayat Karte Hain Ke Mujhe Hazrat Imame Husain Bin Ali RadiyAllahu Ta'Aala Anhuma Ne Bayaan Kiya Ke Main Hazrat Umar Farooq RadiyAllahu Ta'Aala Anhu Ke Paas Gaya Wo Mimbar Par Khutba De Rahe The Main Mimber Par Chada Aur Kaha Mere Baap Ke Mimber Se Utar'iye Aur Apne Baap Ke Mimber Par Jaiye. Hazrat Umar RadiyAllahu Ta'Aala Anhu Ne Farmaya , Mere Baap Ka Mimber Nahi Tha
Aur Mujhe Pakad Kar Apne Paas Bitha Liya , Main Apne Saamne Rakhi Kankariyo'n Se Khelta Raha , Jab Aap Mimber Se Utre To Mujhe Apne Ghar Le Gaye Phir Mujhe Farmaya Kitna Accha Ho Agar Aap Gaahe Gaahe Tashreef Laye'n.
Farmate Hain Ek Din Main Unke Paas Gaya Aap Hazrat Ameer Mu'aviyah RadiyAllahu Ta'Aala Anhu Se Tanhayi Main Masroofe Guftagu The Aur AbdullAh Ibne Umar Darwaze Par Khade The Ibne Umar Wapas Huwe To Main Bhi Unke Saath Wapas Aagya. Ba'd Main Hazrat Umar RadiyAllahu Ta'Aala Anhu Se Mulaqaat Huwi Unhone Farmaya , Kya Baat Hai Main Ne Aapko Nahi Dekha.
Main Ne Kaha Ameerul Momineen ! Main Aaya Tha Aap Hazrat Ameer Mu'aviyah(RadiyAllahu Ta'Aala Anhu) Se Guftagu Farma Rahe The To Main Ibne Umar Ke Saath Wapas Aagaya.
Unhone Farmaya , Aap Ibne Umar Se Zyada Haqdaar Hain Hamare Saro'n Ke Baal Allah Ne Aapke Barkat Se Ugaye Hain.
【Al-Asbah Ibne Hajar Asqalaani】
◆ Umar Bin Abdul Azeez Aur Sayyeda Zahra
Umar Qawariri Farmate Hain Ke Hame Yahya Bin Sa'eed Ne Sa'eed Bin Abbaan Qurshi Se Riwayat Ki Ke Hazrat AbdullAh Bin Hasan Bin Hasan , Hazrat Umar Bin Abdul Azeez Ke Paas Gaye Wo Nau_Umar The Unki Badi Badi Zulfe The'n Hazrat Umar Bin Abdul Azeez Ne Unhe Unchi Jaga Bithaya.
Unki Taraf Mutawajjuh Huwe Aur Unki Zarurate'n Puri Ki Phir Unke Jism Ke Ek Bal Ko Uncha Karke Farmaya Ke Inki Allah Ta'Aala Ne Izzat Ki Aur Farmaya Shafa'at Karne Ke Liye Ise Yaad Rakhna. Jab Wo Tashreef Le Gaye To Unki Qaum Ne Unhe'n Malamat Ki Aur Kaha Aap Ne Ek Nau_Umar Bacche Ke Saath Aisa Sulook Kiya.
Unhone Farmaya, Mujhe Mu'atabar Aadmi Ne Bayaan Kiya Goya Ke Main RasoolAllah ﷺ Ki Zubane Aqdas Se Sun Raha Ho'n ,
Aapne Farmaya , Fatima Meri Lakhte Jigar Hain Unki Khushi Ka Sabab Meri Khushi Ka Sabab Hai. Aur Main Janta Hon Ke Agar Hazrat Fatima TuzZahra (RadiyAllahu Ta'Aala Anha) Tashreef Farma Hote To Main Ne Jo Kuch Unke Bete Se Kiya Hai Usse Khush Hote.
Logo'n Ne Pocha Ke Aap Ne Jawaan Ke Pet Ki Chutki Li Hai Aur Jo Kuch Aapne Kaha Hai Uska Kya Matlab Hai?
Farmaya , Banu Haashim Ka Har Fard Shafa'at Karega Mujhe Ta'waqqu Hai Ke Mujhe Unki Shafa'at Haasil Hogi.
Unhi Hazrat AbdullAh Bin Hasan Bin Hasan RadiyAllahu Ta'Aala Anhum Se Riwayat Hai Ke Main Kisi Kaam Se Hazrat Umar Bin Abdul Azeez Ke Darwaze Par Gaya Unhone Farmaya, Jab Aapko Mujh Se Koyi Kaam Hoto Paighaam Bejh Diya Kare'n Ya Tehreer Farma Diya Kare'n , Mujhe Allah Ta'Aala Se Hayaa Aati Hai Ke Main Aap Ko Apne Darwaze Par Dekho'n.
◆ Imaam Maalik
Jab Ja'afar Bin Sulaimaan Ne Imaam Maalik Ko Kode Lagwaye Aur Jo Saza Dena Thi Di Aur Unhe'n Be_Hoshi Ki HaaLat Main Otha Kar Le Jaya GayaLog Aap Ke Paas Aaye Jab Efaqa Huwa To Farmaya , Main Tumhe Gawah Banata Ho'n Ke Main Ne Maarne Wale Ko Mu'af Kar Diya.
Ba'd Main Iska Sabab Pucha Gaya To Farmaya, Mujhe Khauf Hai Ke Marne Ke Ba'd BaarGahe Risalat Main Haaziri Hogi To Mujhe Huzoore Akram ﷺ Se Haya Aayegi Ke Meri Waja Se Aap Ki Aal Ka Ek Fard Jahannam Main Jaye
Kehte Hain Ke Khaleefah Mansoor Ne Aap Se Kaha Ke Main Ja'afar Se Aapka Badla Dilwata Hon To Imaam Ne Farmaya , Khuda Ki Panah ! Aisa Nahi Ho Sakta Ba-Khuda Jab Chabuk Mere Jism Se Othta Tha To Main Unhe'n Nabi Kareem ﷺ Ki Qarabat Ki Bina Par Mu'af Kar Deta Tha.
◆Har Saal Hajj
Shaikh Akbar Muhiyuddeen Ibne Arbi Apni Tasneef Masa'maratul Akhyaar Main Apni Sanade Muttasil Se Hazrat AbdullAh Ibne Mubarak Se Riwayat Karte Hain Ke Ba'z Muta'qad Ko Hajj Ki Badi Aarzu Thi Unhone Faramya,Mujhe Ek Saal Bataya Gaya Ke Hujjaaj Ka Ek Qafila Baghdaad Shareef Main Aaya Hai , Main Ne Unke Sath Hajj Ke Liye Jane Ka Irada Kiya, Apni Aasteen Main Paanch Sau(500) Dinaar Daale Aur Bazar Ki Taraf Nikla Taake Hajj Ki Zaruriyaat Khareed Laa'o'n. Main Ek Raste Par Ja Raha Tha Ke Ek Aurat Mere Samne Aayi , Usne Kaha Allah Ta'Aala Tum Par Raham Farmaye Main Sayyed Zaadi Hon Mere Baccho'n Ko Tan Dhaanpne Ke Liye Kapda Nahi Hai Aur Aaj Chautha Din Hai Ke Ham Ne Kuch Nahi Khaya. Uski Guftagu Mere Dil Main Utar Gayi Main Ne Paanch Sau (500) Dinaar Uske DaaMan Main Daal Diye Aur Unhe Kaha Aap Apne Ghar Jaye'n Aur In Dinaro'n Se Apni Zaruriyaat Puri Kare'n Main Ne Allah Ta'Aala Ka Shukr Ada Kiya Aur Wapas Aagaya.
Allah Ta'Aala Ne Is Baar Hajj Par Jane Ka Shouq Mere Dil Se Nikaal Diya Dusre Log Chale Gaye, Hajj Kiya Aur Wapas Laut Aaye. Main Ne Socha Ke Dosto'n Se Mulaqaat Kar Aao'n Aur Unhe Salaam Kar Aa'on. Chunanche Main Gaya Jis Dost Se Milta Use Salaam Kehta Aur Kehta Allah Ta'Aala Tumhara Hajj Qubool Farmaye Aur Tumhari Koshish Ki Jaza-E- Khair Ata Farmaye____ To Wo Mujhe Kehta Ke Allah Ta'Aala Tumhara Hajj Bhi Qubool Farmaye. Kayi Dosto'n Ne Isi Tarah Kaha.
Raat Ko Soya To Nabi Akram ﷺ Ki Ziyarat Huwi Aap ﷺ Ne Farmaya ,Log Tumhe'n Hajj Ki Jo Mubarak Baad De Rahe Hain Uspar Ta'Ajjub Na Kar, Tumne Ek Kamzoor Aur Zarurat Mand Ki Imdaad Ki To Main Ne Allah Ta'Aala Se Dua Ki , Allah Ta'Aala Ne Ho_BaHoTujh Jaisa Farishta Paida Farmaya Jo Har Saal Tumhari Taraf Se Hajj Karega Ab Agar Chaho To Hajj Karo Aur Agar Chaho To Hajj Na Karo.
◆Taymoor Lang
Shaikh Zainuddeen Abdur Rahmaan Khalaal Baghdadi Farmate Hain Ke Mujhe Taymoor Lang Ke Ek Ameer Ne Bataya Ke Jab Taymoor Lang Marze Maut Main Mubtela Huwa To Ek Din Us Par Sakht Iztiraab Taari Huwa , Muh Siyah Hogaya Aur Rang Badal Gaya , Jab Ifaqa Huwa To Logo'n Ne Usse Surath Bayaan Ki To Usne Kaha Mere Paas Azaab Ke Farishte Aaye The Itne Main RasoolAllahu ﷺ Tashreef Laaye Aur Farmaya ,Ise Cchod Du Kyunke Meri Aulaad Se Muhabbat Rakhta Tha Aur Unki Khidmat Karta Tha Chunanche Wo Chale Gaye.
Aezan: Shamsuddeen Muhammed Bin Hasan Khalidi Farmate Hain, Hamare Ek Sathi Ne Khwab Main Nabi Akram ﷺ Ki Ziyarat Ki Aur Aapke Paas Taymoor Lang Ko Dekha Us Sathi Ne Kaha ,
Ae_Dushmane Khuda !Tum Yaha Pohach Gaye Ho ? Nabi Akram ﷺ Ne Farmaya ,
Ae_Muhammad ! Uska Sabab Ye Hai Ke Meri Aulaad Se Muhabbat Rakhta Tha.
◆Bakhsha Gaya
Aallama Ibne Hajar Makki Heytmi Taqiyuddeen Farsi Se Riwayat Karte Hain , Unhone Ne Ba'z Aaimah Se Riwayat Ki Ke Wo SaaDaate Kiraam Ki Bahot Ta'azeem Kiya Karte The Unse Iska Sabab Pocha Gaya To Unhone Farmaya ,SaaDaat Main Ek Shakhs Tha Jise 'Mutayyar' Kaha Jata Tha Wo Aksar Laho-O- La'ab Main Masroof Rehta Tha Jab Wo Fout Huwa To Us Waqt Ke Aalim Ne Iska Janaza Padhne Main Tawaqquf Kiya To Unhone Khwaab Main Nabi ﷺ Ki Ziyarat Ki Aap Ke Hamrah Hazrat Fatima TuzZahra RadiyAllahu Ta'Aala Anha The'n.
Unhone Us Aalim Se Aeraaz Kiya Jab Usne Darkhwast Ki Ke Mujh Par Nazare Rahmat Farmaiye To Hazrat Khatoone Jannat Uski Taraf Mutawajjuh Huwe , Uspar Etaab Farmaya Aur Irshad Farmaya , Kya Hamara Maqaam Mutayyar Ke Liye Kifayat Nahi Kar Sakta.
◆Ajlaan Ki Rihayi
Allama Muqrezi Farmate Hain , Mujhe Qaazi-ul-Quzah Azuddeen Abdul Azeez Bakri Baghdaadi Hambali Ne Bayaan Kiya Ke Main Ne Khwaab Main Dekha Ke Masjide Nabwi Main Maujood Hon. Kya Dekhta Hon Ke Qabre Muqaddas Khuli Aur Us Main Se Nabi Kareem ﷺ Bahar Tashreef Laaye Aur Tashreef Farma Huwe Aapne Usi Tarah Kafan Zaib Tan Farmaya Huwa Tha Mujhe Daste Aqdas Se Qareeb Aane Ka Ishara Kiya,Main Otha Aur Aapki BaarGaah Main Haazir Ho Gaya. Mujhe Farmaya Mu'ayyid Ko Kaho Ke Ajlaan Ko Riha Kar De?
Main Be'Daar Huwa Aur Hasbe Ma'amool Sultaan Mu'ayyid Ki Majlis Main Pohanch Gaya Aur Muta'addid Bar Qasam Kha Kar Use Bataya Ke Main Ne Kabhi Ajlaan Ko Nahi Dekha Aur Na Hi Meri Usse Shana_Saayi Hai Iske Ba'd Main Ne Waqi'a Bayan Kiya. Badshah Chup Raha Main Bhi Betha Raha Yaha Tak Ke Majlis Darkhwast Hogayi... Badshah Apni Majlis Se Otha Aur Qil'aah Ke Teh Khane Main Gaya Aur Itni Door Jakar Khada Hogaya Jitni Door Zoor Se Phenka Huwa Teer Ja Kar Girta Hai Phir Amire Madina Sayyad Ajlaan Husaini Ko Qaid Khane Se Bula Kar Riha Kar Diye.
◆Sarwah Ki BeeNayi
Allama Muqrezi Ne Kaha , Sayyed Sarwah Ibne Maqbal Hasni Ne Apne Baap Maqbal Ko Hijri:825 Maim Giraftar Kiya Jo Ke Yanmb'a Ke Ameer The' Unki Jaga Unke Bhatije Ko Ameer Muqarrar Kiya Gaya , Maqbal Ko Giraftar Karke Askandariye Le Jaya Gaya' Wahi Qaid Main Unka Wisaal Huwa, Ittefaaq Ki Baat Hai Ke Unke Usi Bete Sarwah Ki Aankho'n Main Garam Salayiya'n Phirwa Di Gaye'n Hatta Ke Unke Aankho'n Ke Dhele Beh Gaye Aur Damaagh Muta'affin Hogaya. Wo Ek Muddat Tak Qaahirah Ke Bahar Rahe Us Waqt Wo NaaBeena The, Phir Wo Madina Taiyeba Gaye Aur Apne Jadde Amjad Hazrat Muhammed Mustafa ﷺ Ke Mazare Mubarak Ke Samne Haazir Hokar Apni Takleef Ki Shikayat Ki, Roye Aur Allah Ta'Aala Se Dua Ki , Wapas Aakar Raat Ko Sogaye To Khwaab Main Nabi Kareem ﷺ Ke Jamale Jaa'n Afrooz Se Musharraf Huwe, Aap Ne Apna Daste Aqdas Unki Aankho'n Main Phera Bedaar Huwe To Allah Ta'Aala Ne Unki BeeNaayi Lauta Di Thi. Ye Khabar Ahle_Madina Main Mash'hoor Hogayi. Ek Arsa Tak Unke Paas Rahe Phir Qaahirah Wapas Aaye.Badhshahe Mulk Ashraf Barasbari Ko Inki Aamad Ki Ettela Mili Aur Ye Bhi Ma'aloom Huwa Ke Wo BeeNa Hain, Badshah Ne Unhe Giraftar Kar Liya Aur Qabeelah Mazeenah Ke Un Du Afraad Ko Talab Kiya Jinho'n Ne Sarwah Ki Aankho'n Main Garam Salayiya'n Pheri Thi Aur Un Duno'n Ko Buri Tarah Mara. Unhone Badshah Ke Saamne Tasalli Bakhsh Gawah Pesh Kiye Jinhone Gawahi Di Ke Hamare Samne Salayi Garam Ki Gayi Aur Hamare Dekhne Ki Baat Hai Ke Sarwah Ki Aankho'n Main Pher Di Gayi. Yaha Tak Ke Unki Aankho'n Ke Dhele Beh Nikle To Badshah Ne Unhe Cchod Diya.
Isi Tarah Ahle_Madina Ne Bataya Ke Ham Ne Sarwah Ko Isi HaaLat Main Dekha Ke Unke Duno'n Dhele Gaayib The Phir Ek Subah Dekha Ke Wo Achhe Bhale Beena The Aur Sarwah Ne Unhe Apne Khwaab Ka Waqi'ah Bayaan Kiya Tha. Badshah Ne Sarwah Ko Riha Kar Diya. Hijri:833 Ki Taa'oon Main Inka Wisaal Huwa.
(RahmatullAhi Alaih-O-RadiyAllahu Ta'Aala Anhu)