◆Parda Zaruri Hai:
Ye Ek Haqeeqat Hai Jiska Inkaar Nahi Kiya Ja Sakta Ke Mauzo'n-O-Mutnasib Aur Haseen -O-Jameel Ashiya Ki Taraf Quloob -O- Nufoos Ka Mailaan Ek Tibyi Amar Hai. Ye Insan Ki Fitrat Mai Hai Ke Jab Wo Kisi Cheez Ko Pasand Kar Leta Hai To Phir Uske Husool Ki Har Mumkin Koshish Karta Hai Isi Waaste Har DukaanDaar Apni Haseen-O-Jameel Ashiya Ka Bar'Sare Bazaar Muzahira Karta Hai Taake Logo'n Ki Nazar Un Par Pade Aur Wo Unki Khobiyo'n Se Matla'a Hokar Unko Haasil Kare. Wo Janta Hai Ke Agar Unko Chupa Kar Rakh Cchoda Aur Kisi Ki Nazar In Par Na Padi To Kisi Ke Dil Main Inke Husool Ka Jazba Paida Nahi Hoga Kyunke Husool Ka Jazba To Dekhne Ke Ba'd Hi Paida Hota Hai Jab Aap Us Haqeeqat Ko Acchi Tarah Jante Hain
To Insaaf Se Bataiye Ke Agar Ek Haseen-O-Jameel Jawaan Aurat Apne Husn-O-Jamaal , Zeenat -O-Aaraish Ke Saath Be-Hijaab Logo'n Ke Saamne Aayegi Jo Log Shehwaat Nafsaani Rakhte Hain Aur Wo MinJaNiBullAh Mahfooz -O- Ma'asoom Bhi Nahi Hain, Kya Wo Mutassir Nahi Hoge?
Aur Kya Unke Jazbaat Main Ek Tehreek Paida Nahi Hogi?
Hogi Zaroor Hogi !
Phir Wo Chaahenge Ke Kisi Na Kisi Tarah Apne Jazbaat Ki Aag Ko Bujhaye'n Aur Kuch Nahi To Qasdan Bar Bar Nazar Karke Lutf Andooz Honge Aur Phir Yahi Lutf Andooz Ek Aadat Ban Jayegi Jo Aage Chal Kar Be-Hayayi Ke Irtekaab Aur Fitnah -O- Fasaad Ka Maujib BaneGi.
Khuda Ki Qasam ! Hamari Izzat -O- Aabru Ki Hifazat Isi Main Hai Ke Ham Allah Ta'Aala Aur Uske Rasule Barhaq ﷺ Ke Muqaddas IrshaaDaat Par Amal Pera Hokar Parde Ki Pabandi Kare'n Aur Karwaye'n.
Allah Ta'Aala Farmata Hain:
Mere Habeeb Momin Mardo'n Se Farma Dijiye Ke Wo Apni Nigaahe'n Neechi Rakhe'n Aur Apni Sharmagaho'n Ki Hifazat Kare'n Ye Unke Liye Pakeezah-Tar Hai
BeShak Allah Isse Ba-Khabar Hai Jo Kuch Wo Karte Hain
Aur Momin Aurato'n Se Farma Dijiye Ke Wo Bhi Apni Nigaahe'n Neechi Rakhe'n Aur Ismat Ki Hifazat Kare'n Aur Apni Zeenat Zaahir Na Kare'n Siwaye Uske Khud Ba-khud Zaahir Hojaye Aur Apne Seeno'n Par Apni Odhniyo'n Se Bukkal Maar Liya Kare'n.
Fitnah -O- Fasaad Aur Be-Hayayi Ki Ibteda-E- Bad'Nazri Se Hoti Hai IsLiye Allah Ta'Aala Ne Sabse Pehle Isi Darwaze Ko Band Farmaya. Mardo'n Aur Aurato'n Ko Yaksaa'n Taur Par Hukm De Diya Ke Wo Apni Nigaaho'n Ko Past Aur Ghairo'n Ki Deed Se Baaz Rakhe'n Aur Apni Shehwaat Ko Apne Qaabu Main Rakhe'n.
Iska Ye Matlab Hargiz Nahi Hai Ke Mard Aur Aurate'n Har Waqt Neeche Hi Dekhte Rahe Aur Kabhi Uppar Na Dekhe'n , Balke Iska Matlab Ye Hai Ke Aapas Main Ek Dusre Ke Husn-O-Jamaal Aur Zeenat -O- Aaraish Se Mutassir Aur Andooz Hokar Ek Dusre Ki Taraf Mailaan Na Kare'n Ke Ye Fitnah Ka Maujib Hai Isi Waaste Wo Pehli Nazar Jo Achanak Bila Qasd-O- Bila Irada Pad Jati Hai , Muaf Hai.
Ba-Shart Ye Ke Nazar Ko Fauran Pher Liya Jaye Kyunke Wo Bure Ta'assuraat Se Mabarra Hogi Haan Wo Dusri Nazar Jo Qasd -O- Irada Se Daale Na'Jaaiz Hogi Kyunke Uske Andar Khwahishe Nafsaani Ka Zaroor Dakhal Hoga.
◆Maslah:
ELaaj -O- Mu'alaja Ke Mauqa Par Tabeeb Ka Ajnabiyah Mareezah Aur Uske Jism Ke Kisi Hissa Ko Dekhna Ya Koyi Ajnabiyah Jo Doob Rahi Ho Ya Uski Jaan Ya Izzat -O- Aabru Kisi Khatra Main Hoti Usko Bachate Huwe Uske Chehre Ya Satar Waghera Par Nazar Pad Jaye To Ye Mustasna Hai.