◆Maa'n Beti Ka Pyaar:
Ummiul Momineen Hazrat Aaisha Siddiqua RadiyAllahu Ta'Aala Anha Ki Riwayat Kurda Is Aur Isse Pehle Mazkoor Shuda Hadees Main Ghour Kiya Jaye To Ma'aloom Ho Jata Hai Ke Ummul Momineen Ki Ye Riwayate Unke Adl-O-Insaaf Aur Diyanat -O- Sadaqat Ki Bahot Badi Daleel Hone Ke Saath Saath Unki Aur Sayyadah Ki Gehri Mohabbat Ki Alamat Hain. Chunanche Isi Tarah Dusri Hadees Main Aaya Hai Ke Hazrat Fatima RadiyAllahu Ta'Aala Anha Se Pocha Gaya Ke Huzoor Akramﷺ Ko Kisse Zyada Mohabbat Hai?
Sayyadah (RadiyAllahu Ta'Aala Anha) Ne Farmaya , Aaisha (RadiyAllahu Ta'Aala Anha) Se.
Unhone Kaha Mardo'n Main Se?
Farmaya , Unke Baap (Siddiqe Akbar RadiyAllahu Ta'Aala Anhu) Se.
★Hazrat Bureedah RadiyAllahu Ta'Aala Anhu Farmate Hain : Huzoorﷺ Aurato'n Main Se Hazrat Fatima (RadiyAllahu Ta'Aala Anha) Aur Mardo'n Main Se Hazrat Ali (RadiyAllahu Ta'Aala Anhu) Ko Sab Se Zyada Mahboob Rakhte The.
【Tirmazi Babul Manaqib Mustadrak Haakim , J:3 , S:155】
★Hazrat AbdullAh Bin Umar RadiyAllahu Ta'Aala Anhuma Farmate Hain: Huzoor Nabi Kareem ﷺ Jab Safar Ko Tashreef Le Jate To Sabke Ba'd Aur Jab Wapas Tashreef Laate To Sab Se Pehle Hazrat Sayyadah Fatima RadiyAllahu Ta'Aala Anha Se Mulaqaat Farmate.
【Al-Mustadrak Haakim, J:3 , S:156】
★Hazrat Abu Sa'eed Khudri RadiyAllahu Ta'Aala Anhu Farmate Hain Ke Huzoor ﷺ Ne Farmaya: Beshak Allah Ta'Aala Fatima Ke Ghazabnaak Hone Se Ghazabnaak Hojata Hai Aur Uske Raazi Hone Se Raazi Hojata Hai.
【Al-Mustadrak Haakim, J:3 , S:154】
★Hazrat Mas'ur Bin Majzuma RadiyAllahu Ta'Aala Anhu Farmate Hain: Huzoor ﷺ Ne Farmaya , Fatima Mere Gosht Ka Tukda Hai Jisne Usko Naraaz Kiya Usne Mujhko Naraaz Kiya Aur Iztaraab Main Dalti Hai Mujhko Wo Cheez Jo Usko Iztaraab Main Daale Aur Takleef Main Daalti Hai Mujhko Wo Cheez Jo Usko Takleef De.
【Bukhari-O- Muslim -O- Tirmazi】
◆Faida:
In Duno'n Hadeeso'n Se Ma'aloom Huwa Ke Jo Shakhs Sayyadah Fatima TuzZahra RadiyAllahu Ta'Aala Anha Ki Ya Unki Aulaad Ki Be_Adbi Kare Ya Unko Aeza Pohchaye Usne Apni Jaan Ko Halaakat Main Daal Diya. Kyun Ke Uski Is Harkat Se UnKo Aziyat Hogi Jo Ghazabe ELaahi Ka Mojib Hai. Jis Tarah Unka Ghazab Ghazbe ELaahi Hai Isi Tarah Unki Riza Main Allah-O-Rasool (عز وجل و ﷺ) Ki Riza Hai.
Chunanche Huzoor Akram ﷺ Ne Farmaya Ke Jo Shakhs Ye Chahta Ho Ke Qayamat Ke Din Main Uski Shafa'At Karo'n To Usko Chahiye Ke Mere Ahle_Bait Ki Niyaaz Mandi Kare Aur Unko Dost Rakhe.
【Dilmi】
◆Hikaayat:
Haaji ImdadullAh Muhajir Makki Farmate Hain Ke Molvi Qalandar Ali Sahab Ko Har Rooz Nabi ﷺ Ki Ziyarat Hoti Thi. Ek Din Kisi Jamaal Ke Ladke Ko Sayyad Tha Tamacha Mara UsDin Se Ziyarate Munqata Hogayi Madina Munawwara Ke Mashayikh Se Ruju Kiya Unhone Ek Waliya Mazjuba Ka Pata Diya Jab Wo Aurat Masjide Nabwi Main Aayi Maulana Ne Arz Ki Sunte Hi Joosh Main Aayi Aur Maulana Ka Haath Pakar Kar Farmaya,
"Shuf Haaza RasoolAlalh ﷺ" Pas Maulana Ne Bedaari Main Chashme Zaahir Se Ziyarat Ki Isse Pehle Us Ladke Se Khata Bhi Muaf Karayi Thi Magar Kuch Mufeed Na Huwa Tha.
【Imdaad-ul-Mushtaaq, S:100】
★Hazrat Husain RadiyAllahu Ta'Aala Anhu Farmate Hain Ke Huzoor ﷺ Ne Farmaya: Ae_Fatima (RadiyAllahu Ta'Aala Anha)! Tujhe Basharat Hai Ke Imam Mehdi Teri Aulaad Se Honge.
【Ibne Asakar Ba-Fathul Kabeer , S:17】
★Hazrat Asma Binte A'meesh RadiyAllahu Ta'Aala Anhuma (Zoja Hazrat Abu Bakar Siddeeq RadiyAllahu Ta'Aala Anhu) Farmati Hain Ke Hazrat Hasan RadiyAllahu Ta'Aala Anhu Ki Wiladat Ke Waqt Main Sayaadah Ke Paas Thi Aur Main Ne Daaya Ke Fara'iz Anjaam Diye, Main Ne Koyi Khoon Waghera Jo Ba'waqte Wiladat Nikalta Hai Na Dekha To Ye Kaifiyat Huzoor Akram ﷺ Se Bayaan Ki To Aap ﷺ Ne Farmaya , Kya Tu Nahi Janti Ke Fatima , Tauhirah-O-Mutehherah Hai Uska Haiz Main Bhi Khoom Nahi Dekha Gaya.
【Masnad】
★Ummul Momineen Hazrat Aaisha Siddiqua RadiyAllahu Ta'Aala Anha Farmati Hain: Ke Main Ne Kisi Ko Nahi Dekha Jo Bethne , Othne , Chalne , Phirne , Husn Khalq Aur Guftagu Main Huzoor ﷺ Ke Saath Hazrat Fatima Binte Rasool ﷺ Se Zyada Mushaba Ho. Ummul Momineen Farmati Hain , Jab Hazrat Fatima RadiyAllahu Ta'Aala Anha Huzoor ﷺ Ke Paas Tashreef Laate'n To Aap ﷺ Unke Liye Khade Ho Jate Aur Unko Choomte Apni Jaga Par Pyaar-O-Mohabbat Se Bithate Aur Jab Huzoor Akram ﷺ Unke Paas Le Jate To Aap RadiyAllahu Ta'Aala Anha Khadi Ho Jati Aur Aap ﷺ Ko Bosa Dete'n Aur Adab-O-Aehtaraam Se Apni Jaga Par Bithate'n.
【Tirmazi Mustadrak Haakim】
◆Faida:
Is Hadees Se Saabit Huwa Ke Agar Koyi Bada Chote Par Shafaqqat -O- Muhabbat Farmate Huwe Aur Chota Bade Ki Ta'azeem Karte Huwe Khada Hojaye To Ye Jaaiz Aur Huzoor ﷺ Se Saabit Hai. Lihaza Ba'z Logo'n Ka Ye Kehna Ke Allah Ke Siwa Kisi Aur Ki Ta'azeem Ke Liye Khada Hona Shirk Hai SaraSar Ghalat Aur Daleel Jaha'lat Hai.
★Ummul Momineen Hazrat Aaisha Siddiqua RadiyAllahu Ta'Aala Anha Farmati Hain: Ke Main Ne Fatima RadiyAllahu Ta'Aala Anha Se Badh Kar Kisi Ko Faseeh Nahi Dekha Aur Aisa Kyun Na Hota Jabke Wo Nabi Kareem ﷺ Ke Beti Thi.
◆Hikayat:
Nuzhatul Majaalis Main Riwayta Hai Ke Sayyadah Fatima RadiyAllahu Ta'Aala Anha Ne Aaisha Siddiqua RadiyAllahu Ta'Aala Anha Se Farmaya Ke Main Tum Se Afzal Hon Isliye Ke Main Huzoor ﷺ Ka Jigar Paara Hon.
Hazrat Aaisha Siddiqua RadiyAllahu Ta'Aala Anha Ne Farmaya, Duniya Main Aisa Hi Hai Jaisa Ke Tum Keh Rahi Ho Aur Aakhirat Main , Main Huzoor ﷺ Ke Saath Bahaisiyate Zuja Ke Hongi To Ek To Aap Ki Daayimi Ma'yiyat Dusre Wahi Darja Jis Main Aap ﷺ Honge, Duno'n Baate'n Mujhe Haasil Hongi Jo Tumhe Haasil Na Hongi Kyunke Tum Hazrat Ali RadiyAllahu Ta'Aala Anhu Ke Saath Hogi Aur Jannat Main Bartar Hona Daleel Fazeelat Hai. Ye Sun Kar Hazrat Fatima RadiyAllahu Ta'Aala Anha Khaamoosh Hogaye'n.
To Hazrat Aaisha Siddiqua RadiyAllahu Ta'Aala Anha Khadi Hogaye'n Aur Sayyadah Ke Sar Ko Choom Kar Kehne Lage'n ,
Ae__Kaash ! Main Tumhare Sar Ka Ek Baal Hoti.
【Nuzhatul Majaalis , J:2 ,S:176】